کولکاتہ ،15؍مارچ (ایس او نیوز۳ایجنسی) ترنمول کانگریس کی سربراہ اور مغربی بنگال کی وزیر اعلیٰ ممتا بنرجی نے اتوار کے سہ پہر کو وہیل چیئر پر 5 کلومیٹر لمبا روڈ شو کیا-

انہوں نے پارٹی کے سینئر رہنماؤں اور حامیوں کے ساتھ جنوبی کولکاتہ کے میو روڈ پر واقع گاندھی مجسمے سے اپنے اس روڈ شو کا آغاز کیا- 1 گھنٹے کے روڈ شو کے بعد ممتا نے دوسری جگہ بھی ریلی کی -انہوں نے کہا کہ مجھے روکنے کی ناکام کوششیں کی گئیں، لیکن میں پوری ریاست میں وہیل چیئر پرسے ہی ٹی ایم سی کیلئے انتخابی مہم میں حصہ لوں گی - میں نے اپنی زندگی میں بہت سے حملوں کا سامنا کیا ہے، لیکن کبھی کسی کے سامنے ہتھیار نہیں ڈالے،میں کبھی سر نہیں جھکاؤں گی- اپنی چوٹ کے بارے میں ممتا نے کہا کہ ایک زخمی شیر زیادہ خطرناک ہے-

خیال رہے کہ10 مارچ کو نندی گرام میں انتخابی مہم کے دوران بائیں ٹانگ، سر اور سینے پر چوٹ آئی تھی- ممتا بنرجی نے بتایا کہ ڈاکٹروں نے انہیں آ رام کا مشورہ دیا تھا کہ مجھے آج انتخابی مہم میں نہیں جانا چاہئے، لیکن مجھے لگا کہ یہ ریلی ہونی چاہئے- خیال رہے کہ ممتا اتوار کی شام درگاپور روانہ ہوں گی- وہ پیر کو 2 جلسے کریں گی- ٹی ایم سی کارکنوں نے ریلی کے دوران نیا نعرہ لگایا:’بھنگ پائے کھیلا ہوبے‘ (ٹوٹی ہوئی ٹانگ سے کھیلوں گا)- روڈ شو سے پہلے ممتا نے سوشیل میڈیا پر لکھا تھا کہ ہم اپنی لڑائی بلا خوف جاری رکھیں گے - مجھے تکلیف ہے، لیکن مجھے لوگوں کی تکلیف زیادہ محسوس ہورہی ہے- ہم نے اپنی اس زمین کی جنگ میں بہت تکلیفیں جھیلی ہیں، بہت ہی پریشانی کا سامنا کرنا پڑے گا، لیکن ہم پھر بھی لڑیں گے-چوٹ لگنے کے بعد ان کا یہ پہلا انتخابی شو ہے-

ادھر ٹی ایم سی نے اپنے انتخابی منشور کے اعلان کو ایک بار پھر مؤخر کردیا ہے- اگلی تاریخ کا اعلان جلد کیا جائے گا-خیال رہے کہ ممتا بنرجی کی ریلی کیلئے اسٹیج پر خصوصی ریمپ بنائے گئے ہیں، تاکہ وہیل چیئر کے ذریعہ انہیں آسانی سے اسٹیج پر لایا جاسکے-ذرائع کے مطابق ممتا 15 مارچ سے مسلسل انتخابی جلسوں میں حصہ لیں گی- وہ 15 مارچ کو پورولیا، 16 مارچ کو بنکورہ اور 17 مارچ کو جھارگرام میں انتخابی ریلی سے خطاب کریں گی-